متعة الادمان

الحُب مشاعر غريزية راقية بداخل كل منّا , تحتاج لإشباعها

دائما ما نحتاج للحب , فاذا وجدناه , استكفينا عما هو ادنى

وان لم نجده فنحن دائمين البحث عنه حتى و ان اظهرت ذواتنا غير ذلك - تلك هي الحقيقة.

ومشكلة تلك المشاعر انها اذا ما تمت (كروتتها) او اشباعها بما لا يناسبها لفسدت وافسدت جمالها ورقتها وفقدت رونقها و روعتها وتحولّت لشئ آخر هو ادنى من رقيّها

لنصبر وننتظر ولا نتعجّل ... فالحب يأتي بغتة دون سابق انذار

هكذا هو مفاجئ .. مباغت .. جميل

نستشعره بكل حواسنا يغمرنا بفرحة غريبة .. جديدة

نحبُها و ندمنها ولا نرغب إلا في إدمانها

فلإدمانها متعة خاصة لا يستشعرها إلا من يقبل بدس انزيمات العشق في عروقه

ويتحمّل المها ,, و روعتها ,,

لا يستشعرها إلا .... المتحابون :)

بتنّح

عزيزتي و بحبــِك ,
ولما تقوليلي بحبَـك يزيد الغرام جوه منّي
وبسكت لأني
بتنّــح في نني عينيكي البريئة
واسهّـِـم يتوه الكلام جوه منّـي
ومعرفش اقولك بحبك جريئة
وروحي تروحلك و تلمس صوابعك
واغمّض عنيّا لحياتي و مافيها
وافتّح في دنيا شريكتي انتي فيها
يا ملكة زماني وحبي و حناني
و امي لعيالي
صورتهم في حضنك تمّلي في خيالي
بحبك دي كلمة مابزهقش منها
وهفضل لعمرك و طول عمري اقولها
وفـَرحِـك دة نجمة في سمايا و هطولها
واجبها في ايديكي ومش هنسى اقولها
بحبك و هفضل ...
اتنّـح في نني عنيكي الجميلة

:)

لـ نور الدين مصطفى

22/8/2012

3.30 ص

اب ديت البني آدم

كل شئ حوالينا بيتغير مع الوقت و يتجدد

حوض السمك لازم تغيّر ميته عشان السمك اللي فيه مايموتش ..

موبايلك لما يهنّج كتير بيحتاج ينزله سوفت وير جديد ..

جهازك اول لمّا تنزلّه ويندوز جديد بتحتاج تعمله اب ديت ..

حاجات كتير في حياتنا مرتبطة بمبدأ التطوير ..

حاجات كتير في حياتنا بتحتاج اننا نجددها باستمرار عشان تفضل شغّالة

وكذلك احنا كـ (بنـي آدم) بنحتاج نطّور من نفسنا بشكل مستمر و نزوّد معلوماتنا و نتفتّح على مجالات اكتر في الحياة

ودة لاسباب كتير جدا منها ظروف الحياة , فمثلا معظم الشركات دلوقت ان ماكنتش كلها بتطلب خبرة في الكمبيوتر و اللغة و اللي معندهوش الخبرة دي يبقى غير مؤهل لسوق العمل , غير مواكب لظروف العصر ببساطة ماعملش اب ديت لنفسه

على عكس شخص آخر ماكتفاش باخر مرحلة تعليمية وصل ليها و ان كانت جامعية و استخدم اسلوب التعليم المستمر تعب و زاكر و اجتهد عشان يكتسب الخبرة دي  فاصبح مؤهل لظروف السوق و مؤهل لانه يشتغل في الوظيفة دي

الشخص الآخر دة ماستناش توجيه من حد , ماحدش جه قاله اعمل ايه و ماتعملش ايه و ورح فين , لكنه اجتهد و دوّر و اعتمد على نفسه عشان يكتسب خبرة جديدة في مجال جديد

*وعلى فكرة كل مجال بيفتح لك مجال تاني يعني مثلا لو اخدت كورس ICDL ممكن تسمع عن حاجة اسمها PhotoShop فيبقى عندك فضول انك تعرف ايه دة و تتعلمه و تستخدمه فيفتح لك مجالات اوسع و هكذا دواليك ودة من الاسباب اللي تخلينا عندنا دافع او رغبة في التعليم الذاتي

وبالمثل في مجالات تانية كتير

اسباب كتير تانية تخلينا عندنا رغبة في تطوير نفسنا

البني آدم في الايام دي قد تكون قيمته - بالنسبة لأصحاب الأعمال - بالاوبشنز اللي بيمتلكها فمهارة اللغة ومهارة الكمبيوتر و غيرها من المهارات المتخصصة ما هي الا مجموعة من الاوبشنز كل ما تمتلك منها اكتر كل ما بترتقي بنفسك اكتر و اكتر و ساعتها مش هتحتاج تدوّر على شغل لأن هما اللي هيدوروا عليك لأنك مميز و مختلف و عندك حاجات مش عند غيرك

فاحرص دايما على ان يكون عندك اوبشنز مش عند غيرك , مش ماديا و لكن علميا و ثقافيا

اسباب تانية برضو تخلينا عندنا رغبة في التطوير الذاتي لنفسنا

 "وَقُلْ رَبِّ زِدْنِي عِلْما" .. صدق الله العظيم ( طـه : الآية 114)

فالهدف من الآية الكريمة هو الحث على طلب العلم والاستزادة منه و عدم الاكتفاء بقدر معين او الوقوف عند مرحلة معينة

يعني متجيش تخلص ثانوية عامة و تقول ياااااه اخيرا ارتحت من الهم صحيح هو هم و هم تقيل كمان لكنه مش نهاية الدنيا لسة اودامك سنين كتييييير في عمرك تتعلم فيها كل يوم حاجة جديدة , متجيش تخلص جامعة و تقول اخيرا خلص من هم الكتب و المزاكرة و هشتغل بقى و اهلا بالحياة العملية , صحيح الحياة العملية مهمة جدا لكنها ماتمنعكش من تعلم شئ جديد كل يوم .

ايه تقيلة كل يوم .. صعبة ؟؟ بلاش كل يوم ,, كل اسبوع كل شهر .. كل فترة حددها لنفسك تتعلم حاجة جديدة تفيدك في مجال من مجالات حياتك في شغلك في بيتك في عيلتك

اقرا كتيييييييير , ابدأ بقراية الحاجات اللي بتحبها ان شالله كوميكس و روايات , وبعد شوية وتعالا على نفسك و اقرا حاجات مش بتحبها بغرض انك تعرف عنها

اقولّك ... حاول تحب القراية الموضوع بالنسبة لك هيبقى اسهل كتيييير

"و اعرف حاجة عن كل حاجة و اعرف كل حاجة عن حاجة "

خلي الجملة دي اودامك دايما و اعمل بيها وانت الكسبان

وافتكر دايما كل ما يكون عندك اوبشنز اكتر ترتقي بنفسك اكتر و تشوف الحياة من منظور تاني .. منظور العظماء منظور الناجحين .. ساعتها هما اللي هيحتاجوك مش انت اللي هتحتاجهم

 ;)

لـ نور الدين مصطفى

كوكاكولا .. اشرب تفرح

اشرب تفرح

جميل اوي شعار الحملة الاعلانية لـ (كوكاكولا) بتاع "اشرب تفرح"

سايق عربيتك , تلاقي بنر كبيييييير متعلق جنب الكوبري " كوكاكولا .. اشرب تفرح "

فاتح الفيس , تلاقي اودامك " كوكاكولا .. اشرب تفرح "

روحت السوبر ماركت تشتري ربع جبنة براميلي برضو هتلاقي اودامك " كوكاكولا .. اشرب تفرح "

الناس دي عملت فكرة في غاية البساطة و الروعة في نفس الوقت حققت لهم نجاح كبيييييير جدا , عمل حاجة اسمها " لينك "بسيط وربطت ما بين شرب الكوكا و الفرحة و طول الوقت بقا يقوّي اللينك دة من خلال حملاته الاعلانية باشكالها المختلفة

هو عايز يحفزّك انك تشتري الكوكا ف يلعب علي نقطة الضعف عندك الا و هي (احتياجك للاحساس بالفرحة)

فيربط ما بين الاحساس بالفرحة (هدفك كمستهلك عايز تفرح و تزقطط طبعا) وما بين شرب الكوكا (هدفه كبايع عايزك تشتري) ويحط هدفه علي نقطة ضعفك عشان ينجح

نتيجة الانتشار الكبير و التسويق الصح للشعار , العقل اللاواعي عندك بيسجّل الفكرة و يربط ما بين الفرحة و شرب الكوكا

فتلاقيك مثلا ماشي في الشارع مخنوق شوية تروح تشتريلك واحدة كوكا , ساعتها بيكون العقل اللاواعي هو اللي حرّكك و خلّاك تشتري الكوكا وهو اللي يمكن يخليك تحس بفرحة فعلا بعد ما تشربها (نتيجة اللي عقلك اللاواعي فهمه و سجله)

لعب علي معتقدات داخلية يا معلم و ثوابت عقل باطن , فتقريبا مستحيل بعد كدة هتشرب حاجة منافسة لكوكا :D

اديك عرفت الموضوع ماشي ازاي , و شوفت بنفسك كمان نجاحه و مدى تأثيره علي الناس

جرّب بقا تعمل زي الناس الناجحة دي و تعمل لينكات لحاجات كتيرة مهمة في حياتك

اعمل لينك في وقت كنت متألق فيه و الناس سقفت لك علي حاجة حلوة عملتها , و خد اللينك دة و زوّد ثقتك بنفسك لما تيجي تكلّم الناس

اعمل لينك لوقت كنت فيه مبسوووووط جدا و افتكر الوقت دة بكل تفاصيله و افرح من تاني وقت الزعل

اعمل لينك لوقت كان عندك فيه امل ان كل حاجة هتبقا كويسة , و عدا الصعب و حصل زي ما انت توقعت بالظبط , و افتكر اللينك دة و خليك شعلة امل تنوّر للناس طريقهم وقت يأسهم

لينكات كتييييييير محتاجين نعملها في حياتنا عشان نعدي اي صعب , لينكات كتييييييير هفرق معانا اوي لو استخدمناها صح

شوووووف بقا محتاج تعمل لينك لايه في حياتك , و ظبطه ;)

"واني اللي هاجولك ولا اييييييه يا كبيييييير "

:D

لـ نور الدين مصطفى

نحبك و لكن

قد يتفقون علي حبك و يختلفون في طريقة تعبيرهم عنه

في اي تصرف او عمل ما تقوم به ...

قد يجاملك البعض من شدة حبهم لك و انهم لا يريدون احباطك

وقد يصارحك البعض بالعيوب بكل صراحة ووضوح و ينتقدونك ايضا من شدة حبهم لك و رغبتهم في ان يرشدوك للأفضل

هكذا يختلفون في طريقة تعبيرهم عن حبهم لك , و لكنهم - في النهاية - متفقون علي حبك

:)


نور الدين مصطفى
22/2/2012

قوة التفكير

التفكير في حاجة معينة بيدفعك تلقائيا للتركيز فيها

والتركيز فيها بيدفعك للقيام بسلوك بيعبر عن الفكرة

و السلوكيات المعبرة مع الوقت بتتحول لعادات

والعادات مع الوقت بتكوّن شخصية البني آدم

اهتم باختيار افكارك كويس اوي لان افكارك هي بذرة شخصيتك

افكارك .. هي انت

فلو الفكرة كانت ايجابية في البداية هتطلع بنتايج و شخصية ايجابية

ولو كانت سلبية ارميها بعيد و مالكش دعوة بيها خالص و شوف غيرها

:)

لـ نور الدين مصطفى

برة الصندوق

ماتصدقش حد يقولك : "هي ماتجيش غير كدة"

او "مالهاش حل غير كدة "

لو الحل الموجود مش عاجبك , مش متوافق مع مبادئك و شخصيتك

دوّر علي حل تاني

اكيد في حل تاني

بس طول ما انت بتدّور في مكان واحد هتلاقي نفس الحل اللي انت مش عايزه

فكّر في حتة تانية , اطلع بتفكيرك برّة

فكر برّة الصندوق و غير طريقة تفكيرك و لف حوالين المشكلة و شوفها من كذا زاوية

هتلاقي اكتر من حل و اكتر من طريقة

واكيد هتلاقي الحل اللي يريحك و يرضي ضميرك باذن الله

{ اعْقِلْهَا وَتَوَكَّلْ }

:)

فرحّهم .. تفرح

اشتري شيكولاتة من اللي بتحبها و اديها لحد بتحبه

بنيّة .. " لَنْ تَنَالُوا الْبِرَّ حَتَّى تُنْفِقُوا مِمَّا تُحِبُّونَ "

اديها لـ .. والدتك / اخوك او اختك الصغيرة / صاحبك ...

او حتي طفل صغير ماشي في الشارع ومش مهم تكون تعرفه ...

وشوف اد ايه حاجة بسيطة زي دي ممكن ترسم البسمة علي وش اللي هتهديهاله ,

وتفرّحه , و تزود الحب بينك و بينه

عبّر عن حبك ليهم بابسط الحاجات , و فرّحهم , تفرح

:)

خليك ايجابي

خليك ايجابي

اقصر قصة لحياة بني آدم هي " ولد و عاش ثم مات "

لو يومك بيعدي عليك في انك تاكل و تشرب و تنام , ف انت في كارثة حقيقية ,
عفوا , خليني اصدمك و اقولك ان في كائنات آخري بتاكل و تشرب و تنام برضو .

اما انت انسان , اعظم مخلوق خلقه ربنا , ميّزك بالعقل عن باقي المخلوقات , العقل اللي لازم تعرف قدراته كويس ومن خلاله تكتشتف قدراتك انت كمان و مواهبك اللى جواك , تعرف انت بتتقن ايه , و تفيد نفسك و العالم .

" يا ابن آدم انما انت ايام , فاذا ذهب يومك ذهب بعضك. " لـ الحسن البصري

اليوم اللي يعدي عليك من غير اضافة او من غير ما تكون اتعلمت فيه حاجة جديدة , هو يوم ضايع من عمرك .

"ان لم تزد علي الحياة شيئا فانت زائدا عليها." لـ الرافعي

ابدأ يومك بنية انك تضيف جديد في العالم , انك تساعد علي تغييره للأفضل

وانت ماشي في الشارع لو لقيت ورقة عالأرض شيلها , و اعرف انك كدة عملت تغيير ايجابي ولو انه بسيط جدا , لكنه حاجة ايجابية لو ماكنتش انت عملتها كانت فضلت الحاجة السلبية دي موجودة

فماتستهونش بأي تغيير ايجابي و لو صغر .

وافتكر دايما ان التغيير يبدأ من الداخل , ماتخليش الخارج يأثر عليك بالسلب , و غير و اتغيّر للاحسن

:)

نور الدين مصطفي

افرح

والله ما في حاجة في الدنيا كلها تستاهل زعلة ولا تكشيرة وشيلة همّ

كل حاجة بحلوها و مرّها بتعدي و بيجي اللي احلي منها بعدها

ماتبصش للامور من زاوية واحدة , جرّب تبصّلها من زوايا تانية اكيد الرؤية هتختلف

ماتنكدش علي نفسك , النكد لا بيقدم ولا بيأخر ولا بيرجّع اللي راح , و اياك تكون خسران

اضحك عالدنيا و ماتخليهاش تضحك عليك

وافرح كدة من قلبك اوووووي وافتكر دايما فرحتك وسط الناس اللى بتحبهم ويحبوك و جدد ذكرياتك الحلوة معاهم

وافرح و فرحّهم

:)


نور الدين مصطفي

فيولينة فيفالدي

يقولون ان الموسيقي غذاء الروح ...

اما اليوم فقد كانت الموسيقي هي الروح ذاتها ...

لم تكن مجرد مقطوعات موسيقية تُعزف علي الاوتار فحسب ...

ولكنّها كانت شيئا اعمق و اروع من ذلك ...

فقد كانت روحا بحد ذاتها .. من عالمِ آخر

روحا تأخذك بعيداً إلي ما وراء الايقاع و تُحلّق بك في سماوات الخيال ...

روحا تُشعرك بالمعني الحقيقي للجمال ...

وتنطلق إلي ما هو ابعد و اروع من ذلك تحت شمس الابداع ...

شعور غير عادي بالسعادة

الحمدلله من قلبك + ابتسامة حقيقية ( برضو من قلبك ) = شعور غير عادي بالسعادة 

 :)

نتألم لنتعلم

في عيد الحب

الحُب مش بس بيقتصر  عالعُشاق , الحُب له معاني اكبر و ارقي بكتير من كدة

حُب الاهل واحترامهم وتقدير كل حاجة عملوها علشانا

حُب صحابنا و احساسنا بالسعادة واحنا وسطهم

والاهم من دة كله حب الله و العمل لرضاه ساعتها فعلا الدنيا بتكون احلي ما يمكن ان تكون

وف حياتك اكيد في اشكال تانية كتير من الحُب دوّر عليها , عيشها بصدق واضحك لها هتضحكلك

:)

واللي مايدوسش بيتداس

في رثاء الدكتور ابراهيم الفقي

في رثاء الدكتور ابراهيم الفقي

منذ بضع سنوات انبهر ذلك الشاب الصغير بذلك الشخص الذي رآه من خلال شاشة التلفزيون , انبهر بهذا الكم الهائل من التفاؤل و الحماس و النجاح الذي امامه انبهر بهذا الكم الهائل من الحماس الذي يبثه في نفوس مشاهديه .

انبهر من كلماته الساحرة و ما لها من اثر عظيم علي نفسه .

عرف من خلاله معني التنمية البشرية , عرف علوما لم يكن يسمع عنها من قبل و صارت تلك العلوم فيما بعد هي شغله الشاغل .

عرف من خلاله المعني الحقيقي للنجاح , عرف التحدي و الإصرار و الجد من اجل الوصول للهدف .

وعرف عنه بدايته من تحت الصفر الصفر إلي اقصي درجات النجاح , فلم يجد حرجا في صغر البدايات من اجل نٌبل الغايات .

علمّه ذلك الشخص كماعلّم الكثير من ابناء جيله ان النجاح هو خير وسيلة للانتقام .

ظل ذلك الشخص هو احد الاعمدة التي استند عليها ذلك الشاب الصغير , و قد اتخذ من كتبه مرجعا له في اوقات عثرته .

ونال شرف رؤيته مرتين او ثلاثة , وفي كل مرة كان يعلمّه شيئا عن النجاح , وعن اهمية ان يترك المرء اثرا يُنتفع به بعد مماته .

عاش كل لحظة كأنها آخر لحظات حياته , عاش بالإيمان , عاش بالكفاح , عاش بالحب , عاش بالأمل , و قد قدر قيمة الحياة , وقد تعلم منه الشاب ذلك ايضا .

مات ذلك الشخص وترك وراءه علما عظيما و عمل اعظم , مات ذلك الشخص ولكنه باقٍ بيننا بعلمه و عمله مات ذلك الشخص و قد ترك وراءه اجيالا من العلماء , و اجيالا من الشباب الذين بث في نفوسهم كثير من القيم السامية , مات ذلك الشخص وقد ترك في نفوس محبيه معانٍ كثيرة قد زرعها فيهم .

وعزم ذلك الشاب الذي تعلم منك الكثير علي ان يحاول جاهدا ان يبقي علي ما تعلمه منك , و ان ينشره بين الناس قدر ما استطاع .

اللهم اغفر للدكتور ابراهيم الفقي و ارحمه و اجعل مثواه الجنة .

آمين .

نور الدين مصطفي
10/2/2012

ان تكون مبسوطا

انك تكون مبسوط دي حاجة موجودة فعلا و سهلة لو انتا عايزها ,

هتلاقي في حياتك حاجات كتير اوي تبسطك , بس انتا دوّر عليها .

دوّر عالحاجات اللى تخليك مبسوط و اعملها دلوقتي و ماتأجلهاش , اقعد مع الناس اللى بتفرح في وسطيهم و افرح معاهم .

متقعدش تفكر في اللى مضايقك كتير , اى مشكلة و اى حاجة في الدنيا مهما كانت كبيرة هتاخد وقتها و هتعدي .

فكر في ازاي تفرح , اقولك ؟ فكّر ازاي تفّرح غيرك .

من اكتر الحاجات اللى تخليك تفرح بجد , انك ترسم ابتسامة جميلة علي وشوش الناس اللى بتحبهم , فرّحهم و افرح معاهم من قلبك .

وابتسم دايما و قول الحمدلله من قلبك بكل رضا , هتعرف معني الانبساط اللى بجد

ياخي افرح بقا و فكها شوية :)


نور الدين مصطفي
9/2/2012

التمس لهم العذر

التمس لهم عذرا

اذا عنّفك احد المقربين إليك لينهاك عن امرِ او لحثك علي آخر
فالتمس له العذر , فما كان ليفعل ذلك الا من شدة حبه لك وخوفه عليك
:)


نور الدين مصطفي
26/1/2012

مهما طالت عتمة الليل لازم يكون للفجر نور

مهما طالت بينا عتمة الليل , لازم هيكون للفجر نور

مهما طال بينا الطريق و بان لنا مالوش ملامح و مليان صعوبات , مسيره هينتهي النهاية اللى مشينا بيها طول الطريق

مهما تضيق عليك نفسك بما امتلئت من اسباب للحزن و الاكتئاب خلي عندك امل في ان اللى جاي يكون احسن

خلي عندك ثقة بنفسك انك تقدر تخلي نفسك احسن و انك بايدك اللى هتعمل اللى جاي و برضو هتخليه احسن

خلي عندك ايمان بربنا انه مش هيسيبك وقت محنتك و انه لو ابتلاك لفترة فهو عايزك احسن و عايزك قريب منه عشان بيحبك

قرب منه .. اشكيله .. فضفض معاه فهو قريب يجيب دعوة الداعِ

ادعيله يطلعك من اللى انت فيه ايا كان ايه هو اللى انت فيه
واتمنا انه يرضا عنك
واعمل كل حاجة تخليه يرضا عنك

عيش بالصبر عالماصائب و بثقتك بنفسك و ايمانك بربك و رضاه عنك
صدقني ساعتها بس هترتاح

:)

نور الدين مصطفي
20/1/2012

ماتتسرعش في احكامك

ماتتسرعش في احكامك

ماتتسرعش الحكم علي الاشخاص ولا الاشياء , خد وقتك في التفكير و ربط ما يحتاج ربطه ببعضه

خد وقتك تاني لأن هيظهرلك بعد فترة جديد يخليك تغيّر فكرتك الاولي

اتأني و استنا و اهدي , و ماتحكمش غير لما يكون عندك معلوماتك الكافية للدرجة اللى تخليك تحكم حكم صح (إلي حد ما لان مفيش صح مطلق)

ماتبقاش قِفل و تحكم عالحاجة حكم ابدي ,
خلي رأيك مرن بس في الاتجاه الصح و"لا تكن إمعة في نفس الوقت"

:)

نور الدين مصطفي
11 - 1 - 2012

إرضاء الناس غاية لا تدرك

"إرضاء الناس جميعا غاية لا تٌدرك"

حكمة قالوها زمان , و كل يوم بتثبتهلنا الايام .

مستحيل الناس كلها تتفق علي حد , او تتفق علي رأي واحد .

حتي الرُسل و الانبياء الناس اختلفت عليهم ,

ف ماتزعلش ابدا لو لقيت ان الناس مختلفة عليك , طبيعي ان ناس تشوفك كويس و ناس تانية تشوفك العكس .

خد الموضوع ببساطة ,وخـٌد نقد الناس ليك لو كان في محله و حاول تتعلّم منّه و وماتخليش رأي أى حد يأثر فيك بالسلب و يهز ثقتك بنفسك .

ماتحولش ترضي كل الناس عشان ماتتعبش ,عشان ببساطة كل واحد فيهم له حاجة معينة بترضيه و ممكن تكون الحاجة دي علي حساب حاجة ماترضيش حد تاني غيره , او علي حساب نفسك و مبادئك .

م الاخر ...

ارضي نفسك و ضميرك , وارضي ربنا في تصرفاتك و افعالك , اكسب نفسك و اكسب رضا ربك

ساعتها بس مش هتكون خسرت حاجة

:)

نور الدين مصطفي
13/12/2011

غيّر العالم

" كن انت التغيير التغيير الذي تريده في العالم "

جملة عظيمة من رجل عظيم اسمه الماهتما غاندي

كتير مننا بيبص يلاقي حاجة مش عاجباه و بيطلع جزء كبير من طاقته في انتقاد الحاجة دي .

قد تكون الحاجة دي تصرفات بعض الناس او عيوب في نظام , او عدم وجود نظام من اساسه , ايا كان ايه هي الحاجة ...

طب ما تفكر بطريقة تانية مختلفة و إيجابية , ليه مانستفدتش من الوقت و المجهود و الاعصاب اللى طالعة في الانتقاد في اننا نفكر ازاي نغير ما هو قائم سئ , نغيره للاحسن ؟

اسهل حاجة انك تنتقد , بس الاحسن و الافيد ليك و لغيرك , انك تغير او تتغير للاحسن .

يعني لو افترضنا ان في سلوك معين في شخص معين مش عاجبك , اديك عرفت و لاحظت ان دة سلوك مش صح و ماينفعش يبقا فيك , فتتجنب السلوك دة و بكدة يبقا بتطّور من نفسك, ولو في بينك و بين الشخص دة مودة ممكن تنصحه بطريقة لطيفة من غير ما تجرحه ,

غيّر من نفسك و من اللى حواليك للاحسن .

ماتنقدتش و بس دة مش هيفيد بحاجة . لو مالقتش نظام اعمله , حاول انت اللى تعمل النظام , انت اللى تغير الواقع .

ابدأ بنفسك و غيّرها للاحسن , خليك ايجابي , وماتنساش اللى حواليك عشان تغير العالم .

:)

نور الدين مصطفي
26/11/2011

استمع لقلبك

استمع لقلبك

يقول الراحل الخالد ستيف جوبز : إن وقتك محدود، لذلك لا تضيعه بأن تعيش حياة او حلم شخص آخر .

وعليه فلا تسلّم للآخرين دماغك بشكل كامل مستسلما لكل معتقداتهم و افكارهم .

لا تترك الضوضاء الناتجة من اصوات افكار الآخرين تغطي علي صوت نفسك , وتكمم فاه قلبك .

فقط اتبع حدسك , و استمع إلي قلبك , فهم ببساطة يعرفون ما تريد وهم من سيرشدونك إلي ما تريد , ولا شئ سواهم سيفعل .

هذه حياتك انت , لا تقبل بالاختيارات الخاطئة , و لا تسمح لاحد ان يضعك في قفص و يقيدك و افكارك .

جرب ما تود تجربته , اذهب إلي حيث تريد .

كن انت الذي بداخلك .

فقط اتبع حدسك و استمع إلي قلبك .

:)


نور الدين مصطفي
6/11/2011